Во 21-виот век за да направат обичен лекарски преглед, жителите на Облешево потребно е да патуваат до Кочани, да губат дел од драгоценото време и да плаќаат превоз во двете насоки.

Оваа агонија за нив трае повеќе од три години, поточно од времето кога во 2014-та година си заминал и последниот лекар по општа пракса што работел овде.

Сега жителите на Облешево се оставени сами да се снаоѓаат бидејќи никој не сака како што истакнуваат да работи на село. Тие досега неколкупати од надлежните побарале да се реши овој за нив голем проблем, но им било појаснето дека никој од лекарите не изразил желба да работи во Облешево.

Локалната самоуправа обезбедува простор за амбуланта без плаќање на надомест, „Зегин“ веќе има отворено аптека, има еден заболекар а само недостасува лекар од општа пракса.

Како што истакнуваат голем број жители на Облешево тие одвај чекаат некој од лекарите да изрази желба за да работи во нивното село, бидејќи така и тие а посебно повозрасните ќе бидат помирни, нема да се малтретираат со превоз до, и од Кочани а и интервенциите ќе им бидат навремени.

Да се надеваме дека нивните апели некој ќе ги слушне и дека Облешево по три години повторно ќе има вработен лекар кој ќе му помага на населението кога ќе му биде најпотребно.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари