Зградата каде е што е сместена локалната администрација до крајот на оваа година со финансиска помош од Европската Унија ќе треба да добие нов изглед.

За нејзино реновирање, фасадирање, замена на кровот  и доградба на уште едно поткровје ќе бидат потрошени околу 250.000 евра, пари кои што општината ги доби од ИПА програмата на Европската Унија за меѓународна соработка со Благоевград (Република Бугарија).

Проектот е дел од програмата „Зелени згради за заедничка зелена иднина“ со која треба да се подобри енергетската ефикасност на административниот објект на Општина Кочани, како и на Регионалната управа во Благоевград.

Со реновирањето Општинската зграда треба да добие нов лик, нови прозорци, нов кров, на истата висина поткровје за потребите на Советот или на други општински организации, како и посебен лифт за лицата инвалиди. Ако се знае дека во буџетот за 2017 се предвидени средства за промена на електричната, водоводната и канализациската инсталација, тогаш треба и да се очекува нов изглед на Општинската зграда.

Комплетното реновирање треба да биде завршено до крајот на оваа година.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари