Иако на 60-тата седница на Советот на Општина Кочани советниците требаше да дебатираат по само две точки од дневниот ред таа траеше невообичаено долго и во доста тензична атмосфера,

Опозицијата распали по Градоначалникот но и по Министерството за образование. Причините едноставни, презадолженост на општината особено од страна на основните и средните училишта чии долг изнесува близу 750.000 евра! Најголемиот дол на училиштата е за бесплатниот превоз на учениците. Состојбата е лоша да полоша не може да биде, така да следниот градоначалник на општината кој и да е ќе има големи проблеми доколку доверителите подигнат тужби и ја блокираат сметката на Локалната самоуправа.

„Лично сметам дека работата е многу сериозна поради тоа што дел од овие долгови веќе се поодминати и се сè поблиску до тужба од страна на доверителот кој ја има извршено услугата. Тоа значи дека секој ден, Општина Кочани може да биде блокирана од страна на доверителот доколку биде поднесена наплата на овие долгови„ рече Ѓорѓи Алексов, член на Советот,

Сашко Стефановски, член на Советот со свој став околу задолженоста: „Должиме 750.000 евра, повеќе од двесте илјади евра се раздолживме, но за толку во меѓувреме повторно се задолживме. Ако на ова задолжување ги додадеме и близу 3.000.000 евра кредитни долгови состојбата станува алармантна. Мислам дека општината нема сили за да може да се раздолжи и се чека денот кога сметките во општината ќе бидат блокирани, така да наредниот Градоначалник нека се добро подзамисли што се го чека кога ќе седне во градоначалничката фотелја.

„Општината правеше обиди за намалување на долговите, но реално тие не може да се намалат затоа што актуелните побарувања на училиштата беа тие, и 10.000.000 денари што ги одвоивме од Буџетот на Општина Кочани беа за тековната година, а долгот повторно остана ист. Значи состојбата Општината не може да ја реши“ се надоврза членот на Советот Лилјана Арсова.

Атмосферата особено се вжешти кога на говорницата излезе Влатко Трајанов член на Советот.

„Бидејќи ние кога лани дебатиравме, апсолвиравме дека долговите не настануваат како наметната одлука од Владата на Република Македонија за плаќање на превозот на учениците, туку настануваат по многу други основи. Од тие аргумент, јас како обичен граѓанин, се прашувам дали училиштата, не дај Боже, се претворија во пералница за пари? или пак неспособниот Градоначалник поставува за менаџери на училиштата уште понеспособни директори и тоа е главната причина, или недоволниот авторитет што го има како Градоначалник во очите на централната власт, не може да издејствува пари за да ги покрие долговите на училиштата и општината ќе ја остави во енормно големи долгови“ заклучи Трајанов.

Сепак работата ја смири тој што ја започна дискусијата. Советникот Ѓорѓи Алексов предложи општинската администрација да побара од Министерството за образование и од Министерството за финансии да направат нов начин на распределба на средствата за основно и средно образование. Предлогот на Алексов едногласно беше прифатен од советниците.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари