Главна тема на разговорите за време на овој викенд во Градскиот Трговски Центар беше работното место благајник во СОУ „Гошо Викентиев“ во Кочани. Иронијата да биде поголема разговорот на кој присуствувавме го водеа членови на партијата од власта во општината кои беа самокритични на она што се случувало во последните неколку денови.

Имено, новоименуваниот директор на ова средно училиште како што вели нашиот извор му дал рок на благајникот на ова училиште да си замине од работа до 4-ти Септември кога стартува новата учебна година бидејќи според него, ги исполнувал условите за заминување во пензија.

Како што не информираа директорот на местото благајник сакал да вработи веќе „пикирана“ личност. Но, откако некои од челниците во градот биле информирани за планот со местото благајник во ова средно училиште, експресно реагирале, тие веќе имале свој кандидат за тоа работно место и по секоја цена сакале тој да биде вработен.

Нашите извори велат дека ваквото силување на работите внесувало само раздор во партијата во пресрет на Локалните избори.

И додека челниците и понатака размислуваат како да ја изведат работата до крај, не се ни свесни дека законот го штити сегашниот благајник кој веќе поднел барање и има право да бара продолжување на работниот стаж за уште две години.

Доколку сето ова е вистина, се поставува прашањето како ќе реагираат надлежните во државата кога е во прашање овој план на одредени моќници во општината.

Одговорот сигурно е дека ќе биде познат до почетокот на учебната година.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари