Веста што на новогодишните празници беше поставена на социјалните мрежи дека Кочанската ЈЗУ Општа Болница ќе се затвора со цел во Штип да се отвори Клинички центар е невистинита и искажана од поединци без проверени информации, не информираа надлежните од оваа здравствена институција.

За појаснување само, за време на новогодишните празници на социјалните мрежи беше поставена информација дека посетата на Министерот Венко Филипче последниот ден од минатата година отворила неколку прашања меѓу кои и прашањето дека ЈЗУ Општа Болница – Кочани поради намалениот стручен кадар ќе биде затворена и дека пациентите во иднина ќе се препраќаат во Штип каде е планирано да се изгради Клинички Центар.

Ваквата објава внесе немир меѓу дел од вработените кои со право стравуваат за своите работни места но и меѓу дел од жителите на Општина Кочани.

„Не ја прифатив функцијата директор за да ја затворам ЈЗУ Општа Болница во Кочани, напротив се трудиме да овозможиме вработување на поголем број на лекари и друг персонал. Поддршката ја имаме и од надлежните во државата а и од Градоначалникот Николчо Илијев кој навистина покажа големо разбирање за нашиот проблем. Во нашата болница здравствена помош добиваат околу 100.000 луѓе кои гравитираат во овој дел од државата. Ние разговараме отворено а како предлог според пилот програмата се трудиме ЈЗУ Општа Болница и ЈЗУ Здравен Дом да ги споиме како некогаш кога постоеше Медицински центар – Кочани, бидејќи со тоа значително ќе ги намалиме трошоците а функцијата и понатака ќе остане иста“ ни изјави Борка Панова – Директор на ЈЗУ Општа Болница – Кочани.

Дознаваме дека објавата по нејзина интервенција веднаш била симната од социјалните мрежи, што укажува дека сепак не била проверена иако авторот тврдеше дека е точна.

С. Ивановски

DSCN8801

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари