Предвидувањата пополека почнаа да се остваруваат. Како тргнала работата по се изгледа прашањето „Ќе се доигра ли Третата Фудбалска Лига – Исток?“ веќе го добива одговорот „Тешко, и тоа многу тешко“.

Потврда за ваквиот одговор е она што денес се случи по втор пат за само три дена на веќе контроверзниот фудбалски натпревар од 23-тото коло на Третата Фудбалска Лига – Исток „Овче Поле“ – „Малеш“.

Имено, познато е дека претставникот на ФК „Малеш“ во неделата во Свети Николе ја повлекол екипата затоа што домаќинот немал пријавено амбулантно возило иако според пропозициите кои тоа му го дозволуваат домаќинот за ваква употреба пријавил приватно ПМВ што и било констатирано од страна на делегатот во записникот. Но претставникот на ФК „Малеш“ на тој натпревар Ванчо Коловски убеден дека е некој фактор во ОФС – Кочани си заминал за да подоцна успее да издејствува нов натпревар за што „Овче Поле“ и добило Одлука од Комесарот за натпреварување во ТФЛ – Исток со таа разлика што домаќинот морал на Беровци да им ги исплати патните трошоци Берово-Свети Николе и хранарината за играчите. Овчеполци веднаш ги известиле надлежните во ТФЛ – Исток дека ниту имаат намера да ги платат трошоците ниту да го преиграат натпреварот бидејќи аргументите се на нивна страна.

Но денес се случи сепак она што малкумина а веруваме и надлежните од ТФЛ – Исток не го очекувале. Имено на стадионот во Свети Николе се појавиле и делегатот и судиите но од ФК „Малеш“ ниту трага ниту глас. Денес Коловски на квадратен сантиметар ги издрибла оние кои ми веруваа, надлежните од ТФЛ-Исток.

Дознаваме дека оваа денешна лакрдија само ја забрза работата за предвремено прекинување на првенството. И „Овче Поле“ и „Рудар“ и „Кежовица“ отворено најавуваат дека тие нема да одиграат ниту еден натпревар до крајот на првенството бидејќи се незадоволни од тоа како се води целото натпреварување во Третата Фудбалска Лига – Исток.

Дали и овие најави ќе станат реалност ќе се дознае веќе во Недела кога се играат натпреварите од 24-тото коло.

Според најавите екипите се цврсти во своите ставови, но дали ќе биде така!?

Но да се разбереме, не е штета ако се прекине првенството, штета е вакви самонаречени спортски работници да водат фудбалски клубови. Фудбалско Берово со ништо нема заслужено да се најде во рубриките на „црниот фудбал“, но на самоволието на луѓето кои мислат дека го измислиле фудбалот мора некој еднаш засекогаш да им застане на патот.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари