Црвената сијалица е запалена, 4 бода во првите четири натпревари од кои три како домаќини и еден на гостински терен против последно пласираната екипа на „Карбинци“ е еден од најлошите почетоци во првенствата. Сите оние релевантни фактори во „Осогово“ по нерешениот резултат со „Слога 1934“ на домашен терен мора сериозно да се замислат за судбината на еден од најстарите клубови во државата. Без да сакаме ни малку да го оспориме повеќе од заслужениот бод на виничани, во „Осогово“ мора некој да купи метла и да го измети сиот оној „смет“ што се наталожил, но има ли таков херој?

„Осогово“ ниту има игра, ниту задоволително бодовно салдо. Играчи има, но дали сите тие заслужуваат да го носат неговиот дрес. Несфатливо е некои играчи да се борат, да се нервираат за време на играта, а други да се влечат како црева по теренот, а некои да си прават сопствена забава која ги иритира и соиграчите и гледачите. Вака повеќе не иде.

Сега наидуваат потешки и поорганизирани противници, па ако вака се продолжи „Осогово“ може да го доживее најцрното сценарио, да испадне и од Третата лига.

Пред почетокот на првенството во „Осогово“ се донесе ценовник за наградување на играчите. За секоја победа на домашен терен играчите ќе добиваат по 1.000,00 денари, победа на страна носи награда од 1.500,00 денари, а нерешениот резултат 800,00 денари. Свесни во клубот дека без тренинзи нема ниту игра, ниту успеси донесоа одлука за секој тренинг на играчите да им се надоместува по 200,00 денари секако на оние редовните, а не како што некои се однесуваат, доаѓаат на тренинзи а не сакат да работат мислејќи дека и за ваквото нешто треба да си добијат 200,00-те денари.

навистина вака повеќе не може. Најдобро е да се седне на маса и да се разговара со играчите за иднината на клубот, на кого му се игра под овие услови, нека игра, а кој не сака, вратата нека му се отвори. Гледано реално како што се однесуваат некои играчи, тие треба да плаќаат ако сакаат да играат во клуб со име како „Осогово“ а не „преку леб да бараат погача“.

Да, точно, црвената сијалица е запалена, само немој да се загрее па да изгоре.

С. Ивановски

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари