Во дерби натпреварот од 14-тото коло во Третата Фудбалска Лига – Исток, екипата на „Плачковица“ без поголеми напори го совлада индиспонираното и анемично „Осогово“ со 2:0 (2:0). Дека денес во Кочани на стадионот „Никола Мантов“ пред 500 гледачи играше само еден тим покажува податокот што кочанчани само еднаш ја погодија рамката од голот на гостите и еднаш во второто полувреме се обидоа да ја внесат топката во мрежата која на нивна жал заврши покрај десниот дирек на сигурниот Јамаковски.

За волја на вистината натпреварот започна со напади на „жетварите“, но сето тоа изгледаше толку тажно, толку бедно што освен што домаќините во првите 20’ минути изведоа 4 корнери ништо друго не направија. Секоја центрирана топка беше лесен плен за корпулентната и сигурна одбрана на „Плчаковица“. Тодоров инаку најдобриот стрелец на кочанчани во есенскиот дел трчаше, бараше топки, но немаше кој тоа да го направи, да му додаде топка која ќе беше потенцијална опасност за гол. Радовишани знаеја дека десеткуваниот тим на „Осогово“ освен Натков и Тодоров нема кој да повлече па откако лесно се справија со двајцата почнаа да ја играат својата игра. Со брзи и прецизни додавања го освојуваа теренот а контра нападите носеа паника во порозната одбрана на „Осогово“.Се играше 23’ кога Д.Коцев подзаборавен од домашната одбрана прими топка на аголот од шеснаесетникот, следуваше удар по земја кој по лошата интервенција на Лазаров заврши во домашната мрежа. Само една минута подоцна нова сериозна прилика за гостите, но осамениот Р.Коцев од работ на шеснаесетникот биеше високо над голот на Лазаров.

Гостите тука не застанаа. Во 31’ Јанев убаво го проигра Иванов, кој упати одличен центар шут на втората статива каде највисоко скокна Заревски и буквално ја закова топката во мрежата на домаќините.

DSCN8899

До крајот на полувремето домаќините се обидуваа нешто да сторат но немаа едноставно ниту играчи, ниту игра барем да внесат возбудување кај гледачите.

Второто полувреме „жетварите“ го почнаа како и првото, напаѓаа но јалово. Во 50’ по одлично нафрлениот слободен удар од левата страна немаше кој од домаќините да ја упати топката во небранетата мрежа.

До крајот за одбележување е и ударот на Р.Коцев од преку 40 метри кој заврши во пречката на истрчаниот Лазаров и слободниот удар на Натков во 85’ кој Јамаковски со прекрасна интервенција го исфрли во корнер.

Се на се повеќе заслужена победа на гостите од Радовиш кои сега на кочанчани им избегаа три бода на табелата.

DSCN8924

Резултати од 14-тото коло:

„Осогово“ – „Плачковица“  0:2

„Рудар“ – „Слога 1934“  2:1

„Брегалница Голак“ – „Каменица Саса“  0:3

„Малеш“ – „Напредок Здравје“  3:1

„Овче Поле“ – „Работник“  1:1

„Тиверија“ – „Беласица“  1:2

„Василево“ – „Конче Бирлик“  3:0 (службен резултат)

Слободен во ова коло беше „Гит Го Пехчево“

На табелата води „Беласица“ (64:06) со 36 бода, пред „Плачковица“ (33:06) 30, „Овче Поле“ (41:11) и „Каменица Саса“ (34:14) 28, „Осогово“ (27:10) 27, „Кит Го Пехчево“ (22.17) 19, „Брегалница Голак“ (24:18) и „Напредок Здравје“ (19:23) со 18, „Работник“ (15:20) и „Василево“ (16:27) со 17, „Малеш“ (26:27) 15, „Тиверија“ (18:26) 14, „Рудар“ (11:39) 10, „Слога 1934“ (14:34) 9, „Бирлик Конче“ (05:91) 0 бодови.

Следниот викенд се игра последното есенско коло, а екипата на „Осогово“ му гостува на лидерот на табелата и есенскиот шампион „Беласица“.

С. Ивановски

DSCN9185

Секое преземње на фотографии и копирање на текстовите без согласност на комарец повлекува фактурирање на име „Авторски права“.

Коментари