ЗАВРШИЈА ПОДГОТОВКИТЕ НА ЈОЖЕ ЈОВАНОВ

Најдобриот велосипедист на Кочани за сите времиња и најтрофејниот во Македонија кога е во прашање овој спорт, Јоже Јованов, ги заврши петнаесет дневните подготовки за наредното Балканско првенство во велосипедизам.

Јоже Јованов заедно со своите некогашни Клупски другари Бобан Иванов и Кристијан Димитров изминатите две седмици се подготвуваше во тренинг кампот во Италија, во областа Лигурија на брегот на Средоземното Море.

Иако претходно планираше дека по завршувањето на подготовките нема да се враќа во Македонија туку директно ќе замине за Ниш (Србија) по што ќе учествува на Балканијадата. Но Балканијадата која требаше да стартува на почетокот на месец Август е презакажана за 17 Август што е главната причина овој голем спортист да се врати дома.

За време на подготовките Јованов има извозено повеќе од 1.000 километри, но сепак тренингот со најдобриот велосипедист на Јужна Африка во „монт – бајк“, Оливер Муник со кого во еден ден имаше возено 160 километри го смета за еден од најдобрите негови тренинзи досега.

Според зборовите на самиот Јоже Јованов тој е подготвен за Балканијадата од која очекува медал.

С. Ивановски